ព្រៃវែង៖ ក្នុងយុទ្ធនាការធ្វើតេស្តស្វែងរកសារធាតុគ្រឿងញៀននៅខេត្តព្រៃវែងចាប់តាំងពីថ្ងៃទី០៩ ខែតុលា ឆ្នាំ២០២៣ លទ្ធផលរកឃើញថាមានមន្ត្រីនគរបាលចំនួន ១១នាក់បានប្រើប្រាស់សារធាតុញៀន ត្រូវបានបញ្ជូនទៅកាន់មណ្ឌលស្តារនីតិសម្បទា ព្យាបាលបន្សាបអ្នកញៀនគ្រឿងញៀន ក្នុងស្រុកកណ្តាលស្ទឹង ខេត្តកណ្តាល។

ស្នងការដ្ឋាននគរបាលខេត្តព្រៃវែងបានចេញមកបំភ្លឺបែបនេះ ក្រោយពីមានសារព័ត៌មានមួយចំនួនបានផ្សព្វផ្សាយមិនច្បាស់លាស់នៅលើបណ្តាញសង្គមអំពីការឃាត់ខ្លួនមន្ត្រីនគរបាលទាំង ១១រូបនោះ។

ស្នងការដ្ឋានខេត្ត បានអះអាងថា ចំពោះវិធានការអនុវត្តយ៉ាងណាចំពោះមន្ត្រីនគរបាលទាំង ១១រូបនោះ ស្នងការខេត្តនឹងអនុវត្តយ៉ាងម៉ឺងម៉ាត់បំផុតទៅតាមគោលការណ៍សម្រេចពីថ្នាក់ដឹកនាំនៅពេលក្រោយ។

គូសបញ្ជាក់ថា ថ្ងៃទី២៧ ខែកញ្ញា ឆ្នាំ២០២៣ អគ្គនាយកដ្ឋានពន្ធនាគារនៃក្រសួងមហាផ្ទៃ បានប្រកាសថានឹងចុះប្រតិបត្តិការធ្វើតេស្តទឹកនោមរកសារធាតុញៀន លើមន្ត្រីពន្ធគារទូទាំងប្រទេស និងជនជាប់ឃុំដែលសង្ស័យប្រើប្រាស់សារធាតុញៀនដោយពុំមានការផ្តល់ដំណឹងជាមុនឡើយ ខណៈមន្ត្រីណាគេចវេសនឹងត្រូវចាត់វិធានការផ្លូវច្បាប់ផងដែរ។

ចំណាត់ការនេះធ្វើឡើងដើម្បីធានាប្រសិទ្ធិភាពការអនុវត្តការងាររបស់មន្ត្រីពន្ធនាគារនៅតាមមណ្ឌលអប់រំកែប្រែ និងពន្ធនាគាររាជធានីខេត្តឱ្យកាន់តែប្រសិទ្ធភាព និងទទួលបានការជឿទុកចិត្តពីមជ្ឈដ្ឋានទូទៅ៕